On úsh adam dep otyrǵanymyz – Qaraǵandy qalasy ákiminiń burynǵy orynbasarlary Vıktor Ivanov pen Sergeı Grıbenshıkov, memlekettik sáýlet-qurylys baqylaý basqarmasynyń burynǵy basshysy Aleksandr Vorobev, osy mekemeniń qyzmetkeri bolǵan Dáýlet Altynbekov, ákimdik qyzmetkeri bolǵan Tatıana Gýk, sarapshylar – Vladımır Letýnovskıı, Abýl-Amıt Baımensheev, Serik Bektaev, Oleg Sıpýn, Nurqýat Bısenov, Stanıslav Iýrchenko, Evgenıı Lazarev, Andreı Vıbe.
Elıtalyq turǵyn jaı esebindegi 60 páterli turǵyn úı kezinde halyqqa qymbat baǵaǵa satylǵan bolatyn. 2009 jyly paıdalanýǵa berilgen úı 2012 jyldyń sáýir aıynda qulap qaldy. Úıdiń ornalasqan jeri osal, qurylystyń sapasy nashar bolyp shyqty. Qudaı saqtaǵanda, jergilikti bılik turǵyndardy basqa jaqqa kóshirip úlgerdi.
Sol kezdegi jaı eriksiz eske oralady. Turǵyn úı keshenin salyp, paıdalanýǵa bergen – «KarPromInvest» jaýapkershiligi shekteýli seriktestigi. Kompanııa basshylarynyń áýel basta «Bir jyl ishinde kóp qabatty jeti turǵyn úı salyp beremiz» dep lepirgeniniń ózi kúmándi edi. Úıler salynyp jatqan kezde «KarPromInvest» óz quqyqtaryn basqa fırmaǵa – «ServısPromSnab» JShS-ne bergeni de belgili. Osy seriktestiktiń basshysy Andreı Malıanov «Besoba» turǵyn úı keshenin salý kezinde, ıaǵnı 2007-2010 jyldar aralyǵynda úleskerlerden mıllıondaǵan teńge qarajat alyp, qurylysty tolyq aıaqtamastan Reseıge qashyp ketken. Onyń ústinen asa iri kólemde alaıaqtyq jasaǵany úshin qylmystyq is qozǵalyp, halyqaralyq izdeý salyndy. Alaıaq Malıanovtyń basqa da quıtyrqy isteri kóp. Ol basqarǵan kompanııanyń bankke qaryzy 300 mıllıon teńgeden asyp jyǵyldy. Baspanaly bolsam dep, bala-shaǵasynyń aýzynan jyryp aqsha jumsaǵan úleskerler aıaq astynan osyndaı qıyn jaǵdaıǵa dýshar boldy. Alaıda keıin jergilikti bılik eshkimdi baspanasyz qaldyrǵan joq, qalanyń basqa aýdandarynan páterler bóldi.
Qaraǵandy qalasy ákimdiginiń talap aryzyn qanaǵattandyrǵan Qazybek bı atyndaǵy aýdannyń soty jaýapker tulǵalardy memlekettiń paıdasyna 597 mıllıon 501 myń teńge tóleýge mindettedi. Kezinde «Besobany» qabyldap alǵan memlekettik komıssııanyń múshesi bolǵan burynǵy sheneýnikter óz kinásin moıyndamaı, sottyń talap aryzdy qanaǵattandyrmaýyn suraǵanmen, olardyń degeni bolmady. «Qurylys kórer kózge minsiz, sarapshylardyń tujyrymdamasy oń boldy, bizdiń kinámiz qansha? – deıdi olar. – Úıdiń qulaýyna turǵyn úı keshenin jobalaý barysynda ınjenerlik-geologııalyq jumystardy durys júrgizbegender kináli».
Eks-sheneýnikterdiń apellıasııalyq shaǵymyn oblystyq sot ta qanaǵattandyrǵan joq, Qazybek bı aýdandyq sotynyń sheshimi ózgertýsiz qaldyryldy. Endi olar kassasııalyq shaǵymmen Joǵarǵy sotqa júginýge quqyly. Alaıda bul olardy birinshi ınstansııadaǵy sot sheshimi boıynsha memleket qarajatyn qaıtarýdy bastaý mindetinen bosatpaıdy.
Qaırat ÁBILDA,
«Egemen Qazaqstan»
QARAǴANDY
